និទានអប់រំ

រឿងនិទាន៖ កំណាញ់

សេចក្តីកំណាញ់ គឺជាសភាវៈអាក្រក់ផ្លូវចិត្ត​ ដែលជាប់ជំពាក់ក្នុងវត្ថុ ឬរបស់អ្វីម្យ៉ាង ហើយមិនអាចលះបង់បាន ឬមិនសូម្បីចែក​រំលែក​​ដល់អ្នកដទៃ។ កំណាញ់ មានច្រើនសណ្ឋាន ដូចជា កំណាញ់ស្នាម​ញញឹម កំណាញ់ភាសានិយាយស្តីល្អ កំណាញ់ក្នុងការសន្ទនា និង​កំណាញ់ក្នុងការឲ្យវត្ថុជាដើម។

កាលពីព្រេងនាយ មានគ្រួសារមួយមានគ្នា៣នាក់ (ប្តី ប្រពន្ធ និង​កូន​ប្រុស)។ ជារៀងរាល់ព្រឹក តែងតែមានសមណៈមួយអង្គ (អ្នក​បួសក្នុងពុទ្ធសាសនា) និមន្តបិណ្ឌបាតនៅផ្លូវមុខផ្ទះ ហើយតែងតែ​ឈប់នៅមុខផ្ទះ។ ប្តី-ប្រពន្ធនេះតែងតែធ្វើមិនដឹងមិនអើពើ​ឡើយ។

នៅព្រឹក១នោះ ស្រី្តជាប្រពន្ធដោយធុញទ្រាន់នឹងព្រះសង្ឃអង្គហ្នឹង​ពេក ក៏និយាយទៅកាន់លោកថា «ណែ លោកម៉េចមកឈរសុំនៅ​តែ​មុខផ្ទះខ្ញុំអ៊ីចឹង យើងគ្មានអីឲ្យទេទៅចេញទៅ!»។ នៅពេលនោះ​ព្រះថេរៈអង្គនោះក៏ញញឹម ហើយឆ្លើយតបវិញថា «មិនអីទេញោម អរគុណណាស់ អាត្មាបានទទួលពីញោមហើយ»។ ស្រ្តីម្នាក់នេះ​ក៏នឹកឆ្ងល់​ក្នុងចិត្តលាយឡំនឹងចិត្តខឹងថាលោកអង្គនេះពោល​ពាក្យ​​ដៀម​ដាម ក៏និយាយទៅវិញថា «ចុម លោកឯងនិយាយថាម៉េច​ហ្នឹង? ខ្ញុំ​គ្មានអីឲ្យផងម៉េចក៏លោកថា​បាន​ទទួលអ៊ីចឹង?»។ លោក​ក៏​ឆ្លើយ​តបថា «អាតា្មបានទទួលការសន្ទនា ពាក្យឆ្លើយតបពីញោម ព្រោះ​​​រាល់ដងញោមមិនដែលសូម្បីនិយាយស្តីអ្វីមកកាន់អាត្មា គឺ​ញោម​កំណាញ់ណាស់សូម្បីតែស្នាមញញឹម ឬពាក្យសម្តី»។​ 

 

ក្រោយមក ស្រ្តីជាភរិយាបានយកពាក្យនេះទៅប្រាប់ស្វាមីខ្លួន ហើយ​​ស្វាមីក៏ខឹង និងឆ្ងល់ជាខ្លាំង ទើបព្រឹកបន្ទាប់ឲ្យភរិយា​រៀប​ចំ​បាយ​ឲ្យខ្លួនសម្រាប់ដាក់បាត្រលោកអង្គនោះ ដើម្បីបានឱកាស​និយាយ​បញ្ចេញ​​កំហឹង​ និងសន្ទនាឲ្យដឹងរឿងរ៉ាវគ្នាម្តង។ ពេលព្រះ​ថេរៈអង្គនោះនិមន្ត​មកដល់ ក៏ស្រែកឲ្យឈប់ រួចក៏ដាក់បាត្រលោក ហើយសួរលោកថា​«ណែលោក ហេតុអីលោកនិយាយចាក់ដោត ដៀមដាមឲ្យគ្រួសារ​ខ្ញុំកាលពីម្សិលមិញដូច្នោះ?» លោកក៏ញញឹម ហើយតបទៅវិញថា «ញោម អាត្មាមិនបានដៀមដាមឲ្យគ្រួសារ​ញោមទេ គឺអាត្មាពោល​ពាក្យពិត ដោយហេតុថា ភរិយាញោម និងញោមផ្ទាល់ ​តាំងពីដើម​រៀង​​មក​ មិនដែលនិយាយស្តីមក​កាន់​អាត្មា ឬសូម្បីក្រឡេកមើល​អាត្មា​ ឬញញឹមដាក់អាត្មាឡើយ ទើប​តែ​ថ្ងៃម្សិលមិញ និងថ្ងៃនេះ​ប៉ុណ្ណោះ»។ តើញោមដឹងទេ សេចក្តី​កំណាញ់ មិនដែលធ្វើឲ្យបុគ្គល​មានសេចក្តីសុខក្នុងចិត្ត​ឡើយ តែវាតែងតែបំផ្លាញ និងដុតរោល​រាល​បុគ្គលឲ្យក្រៀមក្រំ ក្តៅផ្សា សៅហ្មង ឈឺចាប់ក្នុងចិត្តជានិច្ច។ ពេល​នោះបុរសជាស្វាមីរូបនេះ ក៏ភ្ញាក់រលឹកឡើង ហើយក៏កើត​សេចក្តី​ជ្រះថ្លារៀងដរាបមក។

ផលនៃការលះសេចក្តីកំណាញ់៖

១-កំចាត់សេចក្តីអាក្រក់ក្នុងចិត្ត ធ្វើឲ្យចិត្តស្អាតបរិសុទ្ធស្ងប់

២-ចិត្តរីករាយស្រស់ស្រាយ មានកម្លាំង និងបញ្ញាភ្លឺស្វាង

៣-ចិត្តស្ងប់ គេងលក់ស្រួល សុបិនល្អ អាយុវែង សម្បុរស្អាត

៤-សម្បូរញាតិមិត្ត មិត្តភក្តិរាប់អានច្រើន និងការពារថែរក្សា

៥-បានបុណ្យទៅជាតិក្រោយ

អំណាន ជាអំណាចនៃបញ្ញា (សុមឿន៖ ៣១/ ០៥/ ២០១៨)