គុណប្រយោជន៍៥យ៉ាងនៃការថើប

ការថើប គឺជាការស្តែងចេញនូវមនោសញ្ចេតនា ឬចំណង់នៃអារម្មណ៍ស្រឡាញ់ចូលចិត្ត ឬក៏ស្និទ្ធស្នាលដ៏ជ្រាលជ្រៅចំពោះបុគ្គលណាម្នាក់ដែលខ្លួនថើបនោះ។ ការថើបមិនត្រឹមតែធ្វើឲ្យអ្នកទទួលបាននូវអារម្មណ៍រីករាយស្រើបស្រាល និងរឹតចំណងទំនាក់ទំនងឲ្យកាន់តែល្អប៉ុណ្ណោះទេ តែថែមទាំងមានប្រយោជន៍ដ៏ច្រើនដែលគេមិននឹកស្មានដល់ចំពោះសុខភាពទៀតផង។ យោងតាមការសិក្សាមួយចំនួនបានបង្ហាញថាការថើបមានប្រយោជន៍ដល់សុខភាពដូចខាងក្រោម៖

១.ជួយបង្កើនភាពផ្សុាំ៖ ការសិក្សាថ្មីមួយបានបង្ហាញនៅក្នុង «ទស្សនាវដ្តីសម្មតិកម្មវេជ្ជសាស្រ្ត»(Journal Medical Hypotheses)ថាការថើបអាចជួយបង្កើនដល់ភាពផ្ស៊ាំរបស់ស្រ្តីពីស៊ីតូមេហ្គាឡូវីរូស(Cytomegalovirus)ឬដែលហៅថា ភ្នាក់ងារចម្លងជំងឺខ្វាក់មាន់ ឬជំងឺពីកំណើតផ្សេងៗទៀត តាមរយៈមាត់ពីម្តាយទៅទារកក្នុងកំឡុងពេលមានគភ៌។ ការថើប គឺជាវិធីដ៏ល្អក្នុងការកំចាត់បាក់តេរីតូចៗ និងពង្រឹងការពាររាងកាយពីជំងឺផ្សេងៗ។

២.ជួយឲ្យស្វាមីភរិយាល្អូកល្អឺននឹងគ្នា៖ នរវិទូម្នាក់ឈ្មោះ Helen Fisher បាននិយាយថាការថើបគឺជា «ឧបករណ៍វាយតម្លៃស្វាមីភរិយា»។ ភាគច្រើននៃក្រសោមខួរក្បាល ឬសរសៃប្រសាទនៃលលាដ៍ក្បាល(cranial nerves)ត្រូវបានបញ្ចេញដើម្បីទទួលវេទនារម្មណ៍ពីបបូរមាត់ ថ្ពាល់ អណ្តាត និងច្រមុះ តាមរយៈការថើប ដែលអាចធ្វើឲ្យមានអារម្មណ៍ស្រណុកស្រើបស្រាលបំផុត និងធ្វើឲ្យភាគីទាំងពីរកាន់តែស្រឡាញ់ស្និទ្ធស្នាលនឹងគ្នាទ្វេឡើង។

៣.ជួយកំចាត់កាឡូរី៖ តាមរបាយការណ៍ជាច្រើនបានបង្ហាញថា កាឡូរី(ថាមពលផ្តល់ដោយអាហារ) នឹងត្រូវបានកំចាត់ចោលពី២ទៅ៦កាឡូរី ក្នុង១នាទី ដោយសារការថើប។ វាមានប្រយោជន៍ណាស់ចំពោះអ្នកដែលប្រាថ្នាចង់ឲ្យខ្លួនស្រកទម្ងន់ ឬមិនចង់ធាត់ ព្រោះអ្នកគ្រាន់តែចំណាយពេលថើបឲ្យបានច្រើន ក៏ដូចជាការហាត់កីឡាដែរ។

៤.ធ្វើឲ្យសាច់ដុំមុខរឹងមាំ៖ អ្នកស្រាវជ្រាវជាច្រើនបានអះអាងថា នៅពេលកំពុងថើបគឺត្រូវប្រើកោសិកាសាច់ដុំដល់ទៅ៣០យ៉ាង ដែលអាចជួយពង្រឹង ឬបង្ហាប់សាច់ថ្ពាល់ឲ្យតឹងណែនបានល្អ។ ដូច្នេះ ចូរលោកអ្នកកុំមើលរំលងការថើបឲ្យសោះ ព្រោះវាមិនត្រឹមតែធ្វើឲ្យចំណងក្តីស្នេហ៍របស់អ្នកមានភាពស្រស់បំព្រងប៉ុណ្ណោះទេ គឺវាថែមទាំងជួយរក្សាសម្រស់ផ្ទៃមុខរបស់អ្នកឲ្យនៅតែស្រស់ស្អាតទាក់ទាញបែបធម្មជាតិទៀតផង។
៥.ជួយឲ្យស្រស់ស្រាយបែបធម្មជាតិ៖ របាយការណ៍បែបវិទ្យាសាស្រ្តជាច្រើនបានបញ្ជាក់ថា ការថើបជួយបង្កើនកម្រិតនៃអុកស៊ីតូស៊ីន (Oxytocin) អង់ដូភីន(Endorphin) ឬប្រព័ន្ធកាត់បន្ថយការឈឺចាប់ធ្វើឲ្យរាងកាយមានថាមពលស្រស់ស្រាយ និងដូប៉ាមីន (dopamine) ដែលជួយឲ្យមានអារម្មណ៍រ៉ូមែនទិច៕ (ប្រភព៖ rd.com)
ប្រែសម្រួលដោយ៖ មត សុមឿន

Search This Blog

Mut Somoeun (Mongkol)