តើព្រះយេស៊ូជានរណា?
តើព្រះយេស៊ូជានរណា?
សាសនាគ្រឹះ គឺជាសាសនាមួយនេះត្រូវបានបង្កើតឡើងដោយព្រះយេស៊ូ។ តើព្រះយេស៊ូមានប្រវត្តិដំណើរជីវិតដូចម្តេចខ្លះ ទើបក្លាយទៅជាមនុស្សដ៏អស្ចារ្យអាចបង្កើតសាសនាដឹកនាំមនុស្សរាប់លាននាក់ឲ្យដើរតាមដូច្នេះ? យោងតាមសៀវភៅសាសនាប្រៀបធៀបរបស់សមណនិស្សិត ម៉ែន សារឿន នៃពុទ្ធិកសាកលវិទ្យាល័យព្រះសីហនុរាជបានរៀបរាប់ថា៖
យេស៊ូជាគណាចារ្យមួយរូបមានដើមកំណើតជាជនជាតិជ្វីវ កើតក្នុង ព.ស៥៤៣ ជាកូនរបស់ចូសែហ្វ និងនាងម៉ារី ជារាស្ត្រសាមញ្ញក្នុងក្រុងបេត្តឡេហេម៍ ជិតក្រុងហ្សេរូសាឡឹម។ ដើម្បីរំលឹកដល់ថ្ងៃ ដែលព្រះយេស៊ូកើត ពួកគ្រឹះបរិស័ទ(កាតូលិក) កំណត់យកថ្ងៃទី២៥ ខែធ្នូ ជាថ្ងៃបុណ្យមួយសម្រាប់សាសនា ហៅថាបុណ្យណូអែល។
សម័យនោះក៏មានមនុស្សម្នាមហាជនជាច្រើនមកជួបចោមរួមចង់ឃើញយេស៊ូទារក។ ដំណឹងនេះក៏ជ្រាបដល់ស្តេចហេរូដិ ព្រះអង្គទ្រង់ក្រោធ ហើយបញ្ជាឲ្យសម្លាប់យេស៊ូទារក ឳពុកម្តាយរបស់យេស៊ូក៏បានពង្រត់យកទៅនៅស្រុកអេហ្សិប។ ស្តេចហេរូដិ ខឹងយ៉ាងខ្លាំងបញ្ជាពួកពិឃាតឲ្យសម្លាប់ពួកទារកក្នុងស្រុកចាប់ពី២ឆ្នាំចុះមកក្នុងស្រុកបេត្តឡេហេមឲ្យអស់។ បន្ទាប់ពីស្តេចហេរូដិចូលទីវង្គត់ទៅ កុមារយេស៊ូបាន១២ឆ្នាំ ឳពុកម្តាយក៏នាំទៅកាន់ក្រុងហេរូសាឡឹម។ លុះដល់អាយុ៣០ឆ្នាំ យេស៊ូបានទទួលនាមបញ្ញត្តិថា ជាអ្នកចូលសាសន៍ជាបុត្រព្រះម្ចាស់សួគ៌ ពេលនោះនៅមាត់ទន្លេហ្សូរដាំង ពួកគេឃើញពន្លឺចាំងពីលើមេឃ និងឮសូរសព្ទថា នេះជាកូនសម្លាញ់របស់ខ្ញុំ។ ពេលនោះគេយល់ថាតួវិញ្ញាណព្រះម្ចាស់សួគ៌ចុះមកស្ថិតក្នុងរូបយេស៊ូ។ មានហេតុអស្ចារ្យមកប៉ុណ្ណេះ យេស៊ូក៏ឈ្មោះថាបានគុណវិសេសសម្រេចហើយ ចាប់ពីពេលនោះមក យេស៊ូប្រកាសសាសនាថ្មីតាមលំដាប់ទូទៅទាំងប្រទេសប៉ាលេស្ទីន ដោយព្រះយេស៊ូមានឧបាយពីរយ៉ាងក្នុងការផ្សាយសាសនារបស់ខ្លួនគឺ៖ ទី១. តាំងខ្លួនជាសាស្ត្រាចារ្យប្រៀនប្រដៅ និងទី២. តាំងខ្លួនជាគ្រូពេទ្យអាទិទេពព្យាបាលរោគផ្សេងៗដោយឥតគិតថ្លៃ។
ដោយហេតុទាំងពីរខាងលើនេះហើយ ទើបធ្វើឲ្យរដ្ឋាភិបាលសម័យនោះមានការរង្កៀសខឹងសម្បាយ៉ាងខ្លាំងរកឧបាយសម្លាប់ព្រះយេស៊ូ ក្នុងចំណោមសាវ័កពួកហ្សូដាស៍ទាំង១២នាក់ មានម្នាក់ក្បត់ទទួលរង្វាន់ពីរដ្ឋាភិបាល៣០រៀលប៉ុណ្ណោះ។ ជួនពេលនោះជាបុណ្យប៉ាក ព្រះយេស៊ូប្រជុំសាវ័កទាំង១២នាក់ លៀងភោជនាហារពេលល្ងាចជាមួយគ្នា ហើយប្រាប់ថា ក្នុងចំណោមអ្នកទាំងអស់គ្នាមានម្នាក់ក្បត់ ថាហើយចែកនំប៉័ងគ្រប់គ្នា រួចប្រាប់ថាអ្នករាល់គ្នាបរិភោគទៅនេះជាសាច់របស់ខ្ញុំ រួចហុចស្រាឲ្យផឹកទៀតអ្នករាល់គ្នាផឹកស្រានេះទៅ នេះជាឈាមរបស់ខ្ញុំ។ បន្ទាប់ពីលៀងសាយភោជ យេស៊ូក៏នាំសិស្សគណទៅកាន់ភ្នំអូលីវិយេរ ហើយយប់នោះអវសាន្តជីវិតរបស់យេស៊ូក៏មកដល់ ដោយកូនសិស្សក្បត់នាំពួកទាហាឡើងទៅចាប់ខ្លួនវាយបណ្តើរនាំមកជូនចៅហ្វាយខេត្តហ្សូដាស៍ ដែលមានក្រុមតុលាការ និងមន្រ្តីរាជការ។ យេស៊ូជាបុគ្គលកំព្រា ឯពួកសាវ័ករត់ចោលអស់រលីងនៅសល់តែព្យែរម្នាក់ឯងតាមទៅជាមួយ ដើម្បីចាំមើលដល់ទីបំផុតនៃហេតុការណ៍។ មន្ត្រីទាំងនោះកាត់ទោសប្រហារជីវិតចាត់ឲ្យពិឃាតនាំទៅកាន់ភ្នំគោលគោត្ថា ជាទីសម្រាប់ពិឃាតជិតក្រុងហេរូសាឡឹម ដល់ហើយក៏ពួកពេជ្ឈឃាដចាប់យេស៊ូឆ្កាងទាំងរស់ឥតត្រាប្រណី ជាមួយនឹងចោរប្លន់ពីរនាក់ឆ្កាងអមសងខាងឆ្វេងស្តាំ។ មុនពេលចាកផុតរលត់អស្សាសបស្សាសៈ (ស្លាប់) ព្រះយេស៊ូក៏ដង្ហោយហៅរកព្រះជាម្ចាស់សួគ៌ ថាព្រះម្ចាស់ខ្ញុំ ព្រះម្ចាស់ខ្ញុំ ហេតុអ្វីក៏ទ្រង់បោះបង់ចោលខ្ញុំយ៉ាងនេះ ហើយក៏បានស្រែកផ្តាំផ្ញើដល់ព្យែរ និងពួកមនុស្សដែលកាត់ទោសក្នុងពេលនោះអំពីសីលធម៌ និងបទបញ្ញត្តិរបស់ព្រះយេស៊ូទាំង១០យ៉ាង៕
អត្ថបទដោយ៖ ឈួន ល័ក្ខ
កែសម្រួលដោយ៖ មត សុមឿន
Comments
Post a Comment