ហេតុអ្វីស្ត្រីខ្មែរអាំងភ្លើង ក្រោយពេលសម្រាលកូនរួច?
ហេតុអ្វីស្ត្រីខ្មែរអាំងភ្លើង ក្រោយពេលសម្រាលកូនរួច?
តាំងពីបុរាណកាលកន្លងមក ប្រជាជនខ្មែរយើងកាលណាមានស្ត្រីសម្រាលបុត្រថ្មីៗ ចាស់ទុំតែងតែរៀបចំកន្លែងឲ្យគាត់ (ស្រ្តីដែលសម្រាលកូន) សម្រាកអាំងភ្លើង។ តើខ្មែរយើង ដែលមានទម្លាប់អាំងភ្លើងក្រោយពេលសម្រាលបុត្រនោះដើម្បីអ្វី? ហេតុអ្វីបានមិននាំគ្នាទៅចាក់ថ្នាំ បែរជាទៅអាំងភ្លើងវិញ?
នៅក្នុងសម័យបច្ចុប្បន្ននេះ ជាទូទៅមានស្ត្រីមួយចំនួនដោយមានការណែនាំពីគ្រូពេទ្យ ដោយគ្រាន់តែចាក់ថ្នាំឲ្យបានគ្រប់គ្រាន់ក្រោយពេលសម្រាលបុត្ររួច មិនចាំបាច់អាំងភ្លើងនោះទេ តែមានស្ត្រីមួយចំនួនទៀតចាក់ថ្នាំផង អាំងភ្លើងផង។ ចាស់ៗមួយចំនួនបានមានប្រសាសន៍ថា ស្ត្រីក្រោយពេលសម្រាលបុត្ររួច ត្រូវតែអាំងភ្លើង គឺត្រូវអាំងភ្លើងរយៈពេលកាន់តែយូរកាន់តែល្អ។ ប៉ុន្តែជាទូទៅ ការអាំងភ្លើងក្នុងពេលថ្ងៃ គឺអាចត្រឹមតែកន្លះខែទៅមួយខែក៏បាន តែនៅពេលយប់ត្រូវតែអាំងរាល់ថ្ងៃរយៈពេលពីប្រាំទៅប្រាំមួយខែ ឬអាចដល់មួយឆ្នាំក៏មាន ក្នុងបំណងដើម្បីឲ្យរឹងសសៃ ឬរឹងជើងរឹងដៃជាដើម។
យោងទៅតាមគេហទំព័រកំណើតថ្មីបានរៀបរាប់អំពីការអាំងភ្លើងនេះថា៖ កាលពីបុរាណស្ត្រីខ្មែរជាទូទៅក្រោយពេលសំរាលកូនហើយ ត្រូវអាំងភ្លើងអស់ជាច្រើនថ្ងៃទើបអាចចុះពីគ្រែបាន។ ចំណុចនេះរហូតមកដល់បច្ចុប្បន្ន ទោះបីត្រូវបានគេបំភ្លេចចោលស្ទើរតែទាំងស្រុង ដោយសារតែមានថ្នាំវិទ្យាសាស្ត្រជាជំនួយហើយក្តី ក៏នៅមានស្ត្រីជាច្រើននាក់សង្ស័យថា ហេតុដូចម្តេចក្រោយពេលសម្រាលកូនហើយស្ត្រីត្រូវនៅលើភ្លើង តើវាមានលទ្ធផលល្អបែបណាខ្លះ។
ការពិតអាំងភ្លើងក្រោយពេលសម្រាលកូនរួច គឺជារឿងល្អបំផុតដែលចាត់ទុកថាជាការសម្រាកនៅស្ងៀមៗ បន្ទាប់ពីបាត់បង់ឈាម និងអស់កំលាំងល្ហិតល្ហៃ ក្រោយពេលសម្រាលកូនរួច។ កម្ដៅភ្លើងដែលសមល្មមនឹងថ្នាំបុរាណដែលទទួលទានវាបានជួយសម្រួលឈាមឲ្យរត់ស្រួលក្នុងរាងកាយ និងធ្វើឲ្យរាងកាយត្រឡប់មកកាន់សភាពដើមវិញយ៉ាងឆាប់រហ័ស។ តាមមតិយល់ដឹងក្នុងសម័យវេជ្ជសាស្រ្តថ្មីនេះ ការអាំងភ្លើងក្រោយពេលសម្រាលកូនរួច មិនមែនជារឿងដ៏ចាំបាច់ទេ ក៏ប៉ុន្តែមិនមែនមានន័យថាពុំមានប្រយោជន៍នោះដែរ គ្រាន់តែចំណុចដ៏សំខាន់បំផុតគឺទាមទារឲ្យមានការសម្រាកឲ្យបានគ្រប់គ្រាន់ដើម្បីស្តារស្ថានភាពរាងកាយឲ្យរឹងមាំធម្មតាវិញ ឬថាបើបានអាំងភ្លើងក៏ល្អដែរ ព្រោះចំណុចមួយនេះវាអាចជួយឲ្យស្ត្រី ដែលទើបសម្រាលបុត្ររួចឆាប់មានភាពរឹងមាំឡើងវិញ៕
អត្ថបទដោយ៖ ឈួន ល័ក្ខ
កែសម្រួលដោយ៖ មត សុមឿន
Comments
Post a Comment