វិធីសាស្ត្របង្រៀនកុមារចាប់ពីអាយុ៣ឆ្នាំដល់៩ឆ្នាំ

មនុស្សជាច្រើនតែងគិតថា ការបង្រៀនកុមារតូចៗជាការងាយស្រួល ប៉ុន្តែនេះប្រហែលជាអ្នកដែលគិតដូច្នោះ មិនដែលធ្លាប់ឆ្លងកាត់បង្រៀនក្មេងៗទេ។ ចំពោះអ្នកដែលធ្លាប់បង្រៀនក្មេងតូចៗ ជាពិសេសលោកគ្រូ អ្នកគ្រូថ្នាក់មត្តេយ្យ រមែងត្អូញត្អែរពីបញ្ហាលំបាករកវិធីសាស្ត្របង្រៀនក្មេងៗ។ ខាងក្រោមនេះជាគន្លឹះខ្លះៗដើម្បីជួយឲ្យការបង្រៀនកុមារតូចៗមានប្រសិទ្ធភាព៖

១. បង្រៀនឲ្យធ្វើយាន/របស់លេង៖ ក្មេងៗចូលចិត្តច្នៃរបស់លេងដែលផលិតដោយស្នាដៃគេផ្ទាល់ណាស់។ ដូច្នេះ លោកអ្នកគួរផ្តោតអារម្មណ៍លើចំណុចនេះឲ្យមែនទែន ព្រោះក្មេងៗនឹងសប្បាយចិត្តខ្លាំង ពេលត្រឡប់ទៅដល់ផ្ទះវិញ ហើយអួតបង្ហាញប៉ាម៉ាក់របស់គេនូវអ្វីដែលគេបានផលិត។

២. ចំពោះក្មេងអាយុចន្លោះពី៣ទៅ៦ឆ្នាំ៖ លោកអ្នកគួរយកចិត្តទុកដាក់គិតពីបញ្ហាទំនាក់ទំនងមិត្តភាពរបស់ពួកគេ។ លោកអ្នកមិនគួរគិតតែពីបង្រៀនមេរៀនសង្គមនោះទេ ប៉ុន្តែត្រូវចេះតម្រង់ទិសពួកគេឲ្យចេះគោរពស្រឡាញ់គ្នា រក្សាមិត្តភាពល្អចំពោះគ្នា ចេះយកអាសាគ្នា និងស្នេហាសច្ចៈយុត្តិធម៌ក្នុងសង្គម។

៣. ចំពោះក្មេងអាយុចន្លោះពី៧ដល់៩ឆ្នាំ៖ ក្នុងចន្លោះវ័យនេះ លោកអ្នកគួរបង្រៀនពួកគេឲ្យយល់ដឹងពីតម្លៃនៃមិត្តភាពរវាងមនុស្សភេទផ្ទុយគ្នា និងរបៀបរបបហូបចុក ស្លៀកពាក់ ដើរហើរ និយាយស្តីក្នុងសង្គម។

៤. ចេះអត់ធ្មត់៖ គុណសម្បត្តិដ៏ល្អរបស់គ្រូបង្រៀន គឺភាពអត់ធ្មត់ខ្ពស់។ វាជារឿងគួរឲ្យធុញ ដែលពេលខ្លះអ្នកខំបង្រៀន តែសិស្សមិនចេះ ឬមិនយកចិត្តទុកដាក់ ឬក៏ទទួលបានពិន្ទុទាប យ៉ាងនេះក្តី អ្នកត្រូវតែមានអំណត់បង្រៀនសិស្សដោយក្តីស្រឡាញ់ជានិច្ច។

៥. បង្កើតល្បែងកំសាន្តឲ្យពួកគេសប្បាយ៖ លោកអ្នកត្រូវរិះរកវិធី/ល្បែងកំសាន្តក្នុងពេលបង្រៀនឲ្យសិស្សលេង ឧទាហរណ៍ៈ បង្កើតល្បែងសរសេរពាក្យ ឬល្បែងបែបគណិតវិទ្យាជាដើម។

៦. កំប្លែង៖ នេះជាវិធីចុងក្រោយ ហើយស័ក្តសិទ្ធបំផុត ដែលលោកអ្នកជាគ្រូគួរតែធ្វើឲ្យបាន។ ក្នុងន័យនេះ អ្នកគួរចេះលេងសើចជាមួយសិស្ស ឬកំប្លែងឲ្យពួកគេស្តាប់ ឬក៏ឲ្យសិស្សណាម្នាក់ឡើងសម្តែង ឬកំប្លែងក្នុងថ្នាក់ ដែលវិធីនេះនឹងជួយលួងចិត្តសិស្សឲ្យពេញចិត្តរៀន និងភ្លេចការលំបាក៕ (ប្រភព៖ www.wikihow.com)
ប្រែសម្រួលដោយ៖ មត សុមឿន

Search This Blog

Mut Somoeun (Mongkol)