យល់ដឹងពីអត្ថន័យនៃព្រះពុទ្ធសាសនា

តើពុទ្ធសាសនាជាអ្វី? នេះជាសំណួរដែលតែងតែលើកឡើង ជាពិសេសចំពោះអ្នកកាន់ព្រះពុទ្ធសាសនានៅកម្ពុជា ប៉ុន្តែចម្លើយវិញភាគច្រើនមិនទាន់មានហេតុផលសមស្រប និងយល់ស៊ីជម្រៅនៅឡើយ។ តើពុទ្ធសាសនិកនៅកម្ពុជា មានការស្វែងយល់ពីព្រះពុទ្ធសាសនាដែលជាសាសនារបស់រដ្ឋឬទេ?

ពាក្យថា «ពុទ្ធសាសនា» គឺជាពាក្យបាលី សំស្ក្រឹត ដែលមកពីពាក្យពីរម៉ាត់ថា «ពុទ្ធ+សាសនា» ប្រែថាពាក្យទូន្មាន ពាក្យប្រៀនប្រដៅ ពាក្យអប់រំ សារបណ្តាំ ឬពាក្យផ្ដាំផ្ញើរបស់ព្រះពុទ្ធ ដែលសំដៅដល់ពុទ្ធវចន: ពុទ្ធោវាទ ឬពុទ្ធដីកានោះឯង។

ព្រះពុទ្ធគឺជាមនុស្ស ព្រះអង្គមិនមែនជាទេវ: ឬអវតារនៃអាទិទេពណាមួយទេ។ តាំងពីបុរាណកាលរហូតមកដល់ឥឡូវនេះពួកអ្នកកាន់ព្រហ្មញ្ញសាសនា តែងលើកឡើងថាព្រះសមណគោតមបានក្បត់នឹងលទ្ធិព្រាហ្មណ៍ ព្រោះព្រះសិទ្ធត្ថបានរៀនលទ្ធិវេទ បានប្រព្រឹត្តធម៌ក្នុងសម្នាក់តាបសឈ្មោះ អាឡារៈ និងឧទ្ទកៈដែលជាព្រាហ្មណ៍ដ៏ល្បីល្បាញនៅសម័យនោះ។

អ្នកកាន់សាសនាព្រាហ្មណ៍ប្រកាន់ជឿស៊ប់ថាមហាព្រហ្មប្រសិទ្ធីឲ្យកើតគម្ពីរវេទនេះឡើងមិនមែនមនុស្សតែងទេ ដូច្នេះគេថាព្រះពុទ្ធក៏ជាអវតាររបស់ព្រះព្រហ្មដែរ។យើងដឹងហើយថាព្រះសមណគោតមបានរៀនឬប្រព្រឹត្តធម៌ក្នុងសម្នាក់តាបសទាំងពីរបានខំប្រឹងចម្រើនបានសមាបត្តិមែន ប៉ុន្តែទ្រង់មិនព្រមទទួលយកថាជាផ្លូវនាំឲ្យបានត្រាស់ដឹងទេ ព្រោះព្រះអង្គធ្លាប់បានចម្រើនអានាបាណស្សតិកម្មដ្ឋាននេះតាំងពីកាលព្រះអង្គយាងទៅតាមព្រះបិតាច្រត់ព្រះនង្គ័លកាលពីកុមារភាពម៉្លេះ។ ព្រះសម្ពុទ្ធមិនបានល្មើសគុណតាបសទេ ព្រោះក្រោយពីបានត្រាស់ជាព្រះសម្មាសម្ពុទ្ធទ្រង់មានប្រាថ្នាប្រោសតាបសជាគ្រូព្រះអង្គមុនគេ ប៉ុន្តែពេលនោះតាបសទាំងពីរបានស្លាប់បាត់ទៅហើយ។

ចំពោះពាក្យដែលថាគម្ពីរវេទកើតឡើងដោយមហាព្រហ្មប្រសិទ្ធីនោះជារឿងអួតសុទ្ធសាធ ហើយគម្ពីរវេទខុសប្លែកពីគម្ពីរព្រះពុទ្ធសាសនាឆ្ងាយណាស់។គម្ពីរវេទគេសូត្រសរសើរពួកទេវៈ សូត្របន់ស្រន់អង្វរករព្រះឥន្ទព្រះព្រហ្ម ព្រះពិស្ណុការ ឲ្យអាណិតឲ្យជួយ ឬបន់ស្រន់អារក្ខអ្នកតាឲ្យអត់ទោសឲ្យ។ ឯគម្ពីរពុទ្ធសាសនាជាគម្ពីរដែលអ្នកប្រាជ្ញពុទ្ធសាសនាបានកត់ត្រាពុទ្ធវចនៈទុកឲ្យពុទ្ធបរិស័ទប្រតិបត្តិតាមក្នុងព្រះពុទ្ធសាសនាមិនមានពិធីសូត្របន់ស្រន់ បួងសួងទេ។
ព្រះសម្ពុទ្ធប្រដៅគ្រប់មនុស្សរាល់ពេល រាល់ទីកន្លែងថា សុខទុក្ខកើតអំពីអំពើល្អ និងអាក្រក់ បើបុគ្គលណាបានសាងកម្មល្អនោះនឹងបានផលជាសុខ ចំណែកបុគ្គលណាសាងកម្មអាក្រក់បានផលជាទុក្ខ។ ពុទ្ធសាសនាបញ្ជាក់ជាឱឡារិកថា ការបន់ស្រន់សុំសេចក្ដីសុខក្ដី ការអំពាវនាវសុំជោគជ័យអំពីវត្ថុធាតុទាំងឡាយ មានព្រះអាទិទេពជាដើមកុំថាឡើយត្រឹមម្ដងម្កាល សូម្បីជានិច្ចនិរន្តរ៍ ក៏ពុំបានសម្រេចដែរ៕
អត្ថបទដោយ៖ ឈួន ល័ក្ខ
កែសម្រួលដោយ៖ មត សុមឿន

Search This Blog

Mut Somoeun (Mongkol)