វិធី៦យ៉ាងជួយឲ្យស្វ័យសិក្សាមានប្រសិទ្ធភាព

វិទ្យាសាស្ត្រកាន់តែទំនើប មធ្យោបាយសិក្សាកាន់តែងាយស្រួល ជាពិសេសចំពោះអ្នកដែលស្រឡាញ់ស្វ័យសិក្សា(រៀនខ្លួនឯង)។ ចូរកុំបារម្ភថាអ្នកនៅទីណា ឲ្យតែអ្នកចង់ចេះដឹងមែន គឺអ្នកអាចរៀនដោយខ្លួនឯងបានស្ទើរគ្រប់ទីកន្លែង ដោយមធ្យោបាយដែលអ្នកអាចរៀនបានគឺតាមរយៈឧបករណ៍ផ្សេងៗ ដូចជាអ៊ិនធឺណិត ឯកសារផ្ទុកក្នុងកុំព្យូទ័រ ទូរស័ព្ទដៃ (សៀវភៅ/អត្ថបទ…) ឬការសិក្សាពីចម្ងាយតាម Online ជាដើម។ មធ្យោបាយទាំងនេះ ពិតជាជួយសម្រួលឲ្យស្វ័យសិក្សាមានប្រសិទ្ធភាព។ ចុះលោកអ្នកគួរធ្វើបែបណាដើម្បីឲ្យការសិក្សាដោយខ្លួនឯងទទួលបានផ្លែផ្កាគួរជាទីគាប់ចិត្ត?

លោក Steve Kaufmann ជាអតីតមន្ត្រីការទូតកាណាដា និងជាម្ចាស់ក្រុមហ៊ុនលំដាប់អន្តរជាតិដ៏ជោគជ័យម្នាក់ ហើយក៏ជាស្ថាបនិកនៃគេហទំព័ររៀនភាសាតាមប្រព័ន្ធ Online (LingQ.com) បានផ្តល់ដំបូន្មាននូវគន្លឹះនៃការសិក្សាខ្លួនឯងដូចខាងក្រោម៖

១. ត្រូវមានចំណាប់អារម្មណ៍រៀន៖ រាល់ភាពជោគជ័យនៃកិច្ចការទាំងពួង ត្រូវផ្តើមចេញពីឆន្ទៈ(ចំណូលចិត្ត)។ ក៏ដូចគ្នាដែរ បើអ្នកពិតជាចង់រៀនមែន ចូរកុំខ្វល់ថាទាល់តែមានសាលា មានថ្នាក់ ឬមានគ្រូ ទើបរៀនបានឲ្យសោះ ព្រោះថាការរៀនបែបនោះគ្រាន់តែជាប្រព័ន្ធតម្រង់ទិសប៉ុណ្ណោះ។ សំខាន់បំផុត គឺអ្នកត្រូវរៀនដោយខ្លួនឯង ដែលការរៀននេះអ្នកត្រូវមានឆន្ទៈខ្ពស់ ហើយកន្លែងណាក៏អាចរៀនបាន ជាពិសេសគឺរៀនតាមមធ្យោបាយបច្ចេកវិទ្យាទំនើប (កុំព្យូទ័រ និងទូរស័ព្ទ…)។

២. ត្រូវចេះដោះស្រាយបញ្ហា៖ វាជាការពិបាកបន្តិចនៅពេលដែលអ្នករៀនខ្លួនឯង ព្រោះថាអ្នកចៀសមិនផុតពីការមិនយល់ឡើយ ប៉ុន្តែត្រូវតែរៀនដោយមុះមុត។ បើអ្នករៀនមិនយល់ អ្នកត្រូវជឿថាគ្មានអ្វីដែលគ្មានដំណោះស្រាយទេ ពោលគឺត្រូវអាន គិត និងស្វែងឯកសារដទៃអានបន្ថែមទៀតឲ្យខាងតែយល់។

៣. ត្រូវក្តោបយកខ្លឹមសាររួម៖ បញ្ហាមិនយល់តែងកើតមានជាញឹកញាប់ពេលអ្នកអាន (រៀនខ្លួនឯង) ប៉ុន្តែចំណុចនេះអាចនឹងត្រូវដោះស្រាយបាន បើអ្នកព្យាយាមសិក្សាតាមលំដាប់ (អាន) នៃខ្លឹមសារ ឬស្វែងរកអានឯកសារពាក់ព័ន្ធផ្សេង ហើយកំណត់យកខ្លឹមសាររួមដែលគេចង់និយាយ។
៤. ពេលណាក៏អាចរៀនបាន៖ ការសិក្សាដោយខ្លនឯងគឺងាយស្រួលណាស់ ឲ្យតែអ្នកចង់រៀនមែន ដោយហេតុថាអ្នកមិនចាំបាច់ត្រូវមានគ្រូ ឬសាលាទេ។ ពេលគេង ពេលដើរ ឬពេលបើកឡានក៏អាចរៀនបានដែរ ដោយអ្នកគ្រាន់តែចំណាយខ្លះៗបើកទូរស័ព្ទដៃអានតាមប្រព័ន្ធទំនាក់ទំនងសង្គម ឬបើកវិទ្យុស្តាប់កម្មវិធីអប់រំណាមួយជាការសិក្សាស្រេចទៅហើយ។
៥. ធ្វើជាអ្នកសិក្សាតាមប្រព័ន្ធអប់រំក្នុងសង្គម៖ ការផ្សព្វផ្សាយផ្សេងៗ ក៏ជាការផ្តល់មេរៀនឲ្យអ្នករៀនបានដែរ ជាពិសេសតាមរយៈកាសែត ទស្សនាវដ្តី ខិត្តបណ្ណផ្សព្វផ្សាយ វិទ្យុ ទូរទស្សន៍ ឬយុទ្ធនាការអប់រំនានា គឺសុទ្ធតែជាប្រភពនៃចំណេះដឹង ដែលអ្នកអាចសិក្សាដោយខ្លួនឯងបានយ៉ាងងាយ។
៦. ចូលរួមសិក្សាក្នុងសហគមន៍៖ ចំណុចមួយទៀតជួយឲ្យស្វ័យសិក្សាបានផលល្អ គឺត្រូវចូលរួមក្នុងក្លឹបសិក្សា ឬហៅថាសហគមន៍សិក្សា។ សហគមន៍សិក្សាអាចជាក្រុមសិស្ស/និស្សិតខ្លួនឯង ក្រុមសាស្ត្រាចារ្យ ឬក្រុមអ្នកឯកទេសជំនាញ ឬលើសពីនេះទៀត គឺក្រុមអ្នកឯកទេសតាមប្រព័ន្ធទំនាក់ទំនងក្នុងសង្គមនានា។ ការចូលរួមសិក្សាបែបនេះនឹងជួយឲ្យស្វ័យសិក្សាទទួលបានប្រសិទ្ធភាពខ្ពស់បំផុត៕ (ប្រភព៖ www.pickthebrain.com)
ប្រែសម្រួលដោយ៖ មត សុមឿន

Search This Blog

Mut Somoeun (Mongkol)