តើព្រះពុទ្ធសាសនាផ្សាយចូលមកទឹកដីខ្មែរពីពេលណា?
តើព្រះពុទ្ធសាសនាផ្សាយចូលមកទឹកដីខ្មែរពីពេលណា?
កម្ពុជា គឺជាប្រទេសមួយដែលចាត់ទុកព្រះពុទ្ធសាសនាជាសាសនារបស់រដ្ឋ ហើយប្រជាជនខ្មែរជាង៩០% ជាអ្នកជឿគោរពព្រះពុទ្ធសាសនា។ តើសាសនាមួយនេះបានចូលមកដល់កម្ពុជា តាំងពីពេលណាមក បានជាត្រូវបានកម្ពុជាចាត់ទុកថាជាសាសនារបស់រដ្ឋ ហើយមានអ្នកគោរពប្រតិបត្តិច្រើនយ៉ាងនេះ?
យោងតាមសៀវភៅព្រះពុទ្ធសាសនារបស់សាស្ត្រាចារ្យ ស៊ិន គង់ បានរៀបរាប់ពីប្រវត្តិនៃការចូលមកដល់នៃព្រះពុទ្ធសានានេះក្នុងទឹកដីកម្ពុជាថា៖ ទ្រង់ទ្រាយព្រះពុទ្ធសាសនានាំចូលមកកាន់ប្រទេសកម្ពុជាមុនដំបូង គឺព្រះពុទ្ធសាសនាថេរវាទ។ ច្រើនសតវត្សរ៍មកហើយ ព្រះពុទ្ធសាសនាបានចាក់ឫសគល់នៅក្នុងប្រទេសកម្ពុជា ហើយបានធ្វើឲ្យជីវិតប្រជាពលរដ្ឋខ្មែរមានខ្លឹមសារគ្រប់ចំណុចដូចជា វប្បធម៌ អរិយធម៌ ទំនៀមទម្លាប់ ប្រពៃណី និងរបៀបរបបនៃការរស់នៅក្នុងជីវិតប្រចាំថ្ងៃ។ ដោយហេតុនេះហើយ ព្រះពុទ្ធសាសនា ត្រូវបានជនជាតិខ្មែរយកមកប្រតិបត្តិតាំងពីមកដល់នៅគ្រាដំបូងម្ល៉េះ ហើយត្រូវបានស្ថិតនៅក្នុងក្រអៅបេះដូង និងសន្តានចិត្តខ្មែរគ្រប់រូបរហូតមក។ ចាប់តាំងពីពេលដែលប្រទេសកម្ពុជាបានទទួលនូវពាក្យប្រៀនប្រដៅរបស់ព្រះពុទ្ធមក កម្ពុជាបានដើរតួនាទីយ៉ាងសំខាន់នៅក្នុងការពង្រឹង ពង្រីក ការពារ និងការប្រតិបត្តិតាមគន្លងព្រះពុទ្ធសាសនាយ៉ាងខ្ជាប់ខ្ជួន។
ព្រះពុទ្ធសាសនាថេរវាទ ដែលបានផ្សព្វផ្សាយដោយព្រះបាទធម្មាសោកមហារាជ(ឥណ្ឌា) ដោយមានភស្តុតាងសំអាងគឺគម្ពីរមហាវង្សរបស់កោះស្រីលង្កា។ ក្នុងវគ្គមួយនៃគម្ពីរនេះទាក់ទងនឹងការផ្សព្វផ្សាយព្រះពុទ្ធឱវាទ គម្ពីរមហាវង្សបានកត់ត្រាទុកថា ព្រះបាទធម្មាសោកមហារាជ បានបញ្ជូនសាសនទូតដឹកនាំដោយព្រះមហាថេរជាព្រះអរហន្ត ទៅកាន់តំបន់៩កន្លែង ដែលក្នុងនោះមានកន្លែងមួយឈ្មោះថា ដែនដីសុវណ្ណភូមិ ដែលមានព្រះមហាថេរពីរព្រះអង្គគឺ ព្រះសោណត្ថេរ និងព្រះឧត្តរត្ថេរ បាននិមន្តមកទីនេះក្នុងពុទ្ធសតវត្សរ៍ទី៣ (២៤៧ឆ្នាំមុនគ.ស)។ នៅពេលព្រះមហាថេរទាំងពីរអង្គ និមន្តមកដល់ដែនដីសុវណ្ណភូមិ លោកបានសម្តែង ព្រះសូត្រមួយឈ្មោះថា ព្រហ្មជាលសូត្រ ដល់ប្រជាពលរដ្ឋទាំងឡាយមានប្រជាជនកម្ពុជាជាដើម ដែលរស់នៅលើដែនដីសុវណ្ណភូមិនេះ។
តាមរយៈការសិក្សាស្រាវជ្រាវនៅក្នុងប្រវត្តិនៃការផ្សព្វផ្សាយព្រះពុទ្ធសាសនា ដែលប្រារព្ធឡើងដោយព្រះបាទធម្មាសោកមហារាជ ដែលបានផ្សាយសាសនាទៅកាន់តំបន់ធំៗទាំង៩ នៅសម័យក្រោយសង្គាយនាលើកទី៣ក្នុងឆ្នាំ២៣៤នៃពុទ្ធសករាជ បានកត់ត្រាទុកថា ដែនដីសុវណ្ណភូមិ គឺជាតំបន់មួយក្នុងចំណោមតំបន់ទាំង៩នោះ។ តាមការស្រាវជ្រាវ យើងទទួលបានទិន្នន័យថា ដែនដីគោកនៃអាស៊ីអាគ្នេយ៍ទាំងមូលឈ្មោះថាជ្រោយសុវណ្ណភូមិ។ លើសពីនេះទៀត សម័យនោះដែនដីគោករបស់អាស៊ីអាគ្នេយ៍ គឺមានរដ្ឋតែពីរទេ ដែលគេចាត់ទុកថាមានខឿនវប្បធម៌ អរិយធម៌ចំណាស់ជាងគេនៅទីនេះ គឺរដ្ឋខ្មែរ និងរដ្ឋមន ដែលគេហៅថាខ្មែរ-មននោះឯង។
អត្ថបទដោយ៖ ឈួន ល័ក្ខ
កែសម្រួលដោយ៖ មត សុមឿន
Comments
Post a Comment