គន្លឹះ៥យ៉ាងធ្វើឲ្យស្នេហារបស់អ្នកគង់វង្សស្រស់បំព្រង

ស្នេហា គឺជាធម្មជាតិនៃមនោសញ្ចេតនា ឬចិត្ត ដែលអាចធ្វើឲ្យមនុស្សម្នាក់ៗមានអារម្មណ៍រំភើបញាប់ញ័រ ស្រើបស្រាលត្រេកត្រអាល រីករាយ អន្លង់អន្លោច រហូតដល់គិតថាជាឋានសួគ៌លោកីយ៍នៃជីវិត។ ដោយសារតែស្នេហាមានឥទ្ធិពលខ្លាំងក្លាដូច្នេះហើយ ទើបបានជាមានគូស្នេហ៍មិនតិចនាក់ទេ ដែលរងគ្រោះក្នុងរឿងនេះ ពោលគឺថ្វីត្បិតតែស្នេហាអាចផ្តល់នូវសុភមង្គលផ្លូវចិត្តក៏ពិតមែន ប៉ុន្តែវាក៏ផ្តល់វិបត្តិយ៉ាងធំដែរ ប្រសិនបើគេមិនបានថែរក្សាឲ្យល្អ ឬជួបដៃគូមិនសមបំណងនោះ។ មានមនុស្សជាច្រើនបានផ្តល់ជាបទពិសោធន៍ក្នុងការថែរក្សាស្នេហាឲ្យរស់រវើក ក្នុងនោះមានវិធីសាមញ្ញ៥យ៉ាងដូចខាងក្រោម៖

១.មានសកម្មភាពថ្មីៗដើម្បីធ្វើជាមួយគ្នា៖ ចូរសាកល្បងសរសេរចុះនូវសកម្មភាព ឬគំនិតប្លែកថ្មីៗ ដែលលោកអ្នកពុំធ្លាប់បានធ្វើជាមួយគ្នាពីមុនមក(ផ្លាស់ប្តូរទម្លាប់) ឧទាហរណ៍ៈ ជិះកង់លេង រាំលេង មើលកម្មវិធីកំសាន្ត ហាត់កីឡា ឬញ៉ាំអីជាមួយគ្នាជាដើម។ បន្ទាប់មកចូរធ្វើតាមគម្រោងដែលបានកំណត់នោះរួមគ្នាដោយរីករាយ។

២. ទៅដើរលេងខាងក្រៅជាមួយគ្នា៖ ចូរស្វែងរកទីកន្លែងណាមួយដែលថ្មី ហើយជារមណីយដ្ឋានដ៏ទាក់ទាញមានអាកាសធាតុបរិសុទ្ធស្រស់ថ្លាប្រកបដោយភាពរ៉ូមែនទិច ដើម្បីទៅកំសាន្តជាមួយគូស្នេហ៍របស់អ្នក ពុំនោះទេអាចទៅលេងទីប្រជុំជន ទៅផ្សារទិញទំនិញ ឬទៅមើលកុនជាដើម។ ចូរវេចខ្ចប់ម្ហូបអាហារពីផ្ទះ(ដែលចំអិនរួមគ្នា) ឬក៏ទិញនៅកន្លែងកំសាន្តនោះដើម្បីញ៉ាំ និងថតរូបជាមួយគ្នា។

៣.កំណត់ពេលវេលាដើម្បីពិភាក្សាជាមួយគ្នា៖ ទោះបីអ្នករវល់កិច្ចការយ៉ាងណាក៏ដោយ អ្នកត្រូវតែរកពេលយ៉ាងហោចណាស់ឲ្យបាន១ដងក្នុង១សប្តាហ៍ដើម្បីញ៉ាំកាហ្វេ ឬអ្វីមួយជាមួយគ្នា និងពិភាក្សាសួរសុខទុក្ខគ្នាទៅវិញទៅមកអំពីបញ្ហាផ្សេងៗដែលបានកើតឡើងក្នុងជីវិតកន្លងមក និងរកគន្លឹះរៀបចំគម្រោងដើម្បីធ្វើនៅសប្តាហ៍បន្ត។

៤.ពិភាក្សាគ្នាអំពីជីវិតសិច៖ សិចគឺជាបញ្ហាមួយដ៏សំខាន់មិនអាចខ្វះបាននៅក្នុងជីវិតគូស្នេហ៍ដែលលោកអ្នកមិនគួរមើលរំលងចំណុចនេះទេ។ មានគូស្នេហ៍ជាច្រើនដែលមានស្តង់ដារជីវភាពរស់នៅសមរម្យ ប៉ុន្តែបែរជាជួបបញ្ហារកាំរកូសគ្មានសុភមង្គល ឬបែកបាក់គ្នា ព្រោះតែមិនចុះសម្រុងគ្នាក្នុងរឿងសិច។ ដូច្នេះអ្នកគួរតែយល់ដឹងពីតម្រូវការនេះ និងពិភាក្សាជាមួយគ្នាដោយចំហថាតើត្រូវផ្លាស់ប្តូរកែកុនចំណុចខ្វះខាតមិនល្អអ្វីខ្លះទើបប្រសើរ។

៥.ប្រាប់ពីមូលហេតុដែលអ្នកស្រឡាញ់៖ រំលឹកអនុស្សាវរីយ៍ចាស់ ដោយប្រាប់ពីទីកន្លែងដំបូង និងមូលហេតុដែលអ្នកលង់ស្នេហ៍ដៃគូរបស់អ្នក។ ចូរនិយាយប្រាប់ដៃគូអ្នកអំពីគុណសម្បត្តិសំខាន់ៗ ដែលធ្វើឲ្យអ្នកពេញចិត្តបំផុតហើយអត់ទ្រាំនឹងស្ងើចសរសើរមិនបាន រហូតដល់ជាប់ស្នេហ៍មិនអាចខ្វះបានក្នុងជីវិត៕ (ប្រភព៖ marianneclyde.com)
ប្រែសម្រួលដោយ៖ មត សុមឿន

Search This Blog

Mut Somoeun (Mongkol)