វិធី៥យ៉ាងធ្វើឲ្យការនិយាយនៅមុខសាធារណជនបានល្អ

ទោះបីអ្នកចាំ ឬយល់បានកម្រិតណាក៏ដោយ បើអ្នកភ័យខ្លាចញ័រញាក់(បាត់ទំនុកចិត្តខ្លួនឯង)ហើយ ការនិយាយ ឬធ្វើបទបង្ហាញនឹងត្រូវរំខានដោយទឹកមុខស្លេកស្លាំង ញ័រជើងដៃ ត្រជាក់ជើងដៃ បែកញើស ញ័របេះដូង កូរពោះ ចាប់នេះចាប់នោះមិនជាប់និយាយត្រដិតតតាក់តតុបរអាក់រអួល ឈានដើរខុសទំនងជាដើម។ ទាំងនេះអាចធ្វើឲ្យអ្នកស្តាប់ ឬអ្នកទស្សនាគ្មានចំណាប់អារម្មណ៍។ ដូច្នេះ ដើម្បីជួយឲ្យការនិយាយនៅមុខសាធារណជនប្រកបដោយជំនឿចិត្ត គេគួរអនុវត្តតាមវិធីសាមញ្ញ៥យ៉ាងដូចខាងក្រោម៖

១. សម្របតាមចំណាប់អារម្មណ៍អ្នកមើល/ស្តាប់៖ មនុស្សដែលភ័យញ័រក្នុងពេលនិយាយមុខសាធារណជនភាគច្រើនគឺមកពីប្រុងប្រយ័ត្នខ្លួនឯងពេក។ អ្នកទាំងនោះតែងគិតថាអ្នកមើល ឬស្តាប់នឹងចាំចាប់កំហុសខ្លួនគ្រប់យ៉ាង ហើយវាយប្រហារមកលើខ្លួនក្រោយនិយាយ ឬបង្ហាញចប់។ ចូរកុំមានអារម្មណ៍បែបហ្នឹងឲ្យសោះ ព្រោះបើអ្នកប្រុងប្រយ័ត្នខ្លាំង បារម្ភខ្លាចខុសខ្លាំង វានឹងនាំឲ្យអ្នកបាត់បង់ទំនុកចិត្តគ្រប់យ៉ាង ហើយមិនហ៊ាននិយាយចេញ ឬនិយាយមិនកើតតែម្តង។ អ្នកមិនត្រូវគិតពីខ្លួនអ្នក ឬការវាយបកពីអ្នកមើល/ស្តាប់ពេកទេ ផ្ទុយទៅវិញ អ្នកគួរធ្វើយ៉ាងណាឲ្យពួកគេសំឡឹងមកអ្នក គិតជាមួយអ្នក យល់ដូចអ្នក សើចសប្បាយជាមួយអ្នក ហើយចាប់អារម្មណ៍ពីអ្វីដែលអ្នកកំពុងបង្ហាញ។

២. ដឹងពេលកំពុងនិយាយ/ ធ្វើ៖ ភាពភ័យខ្លាច ញ័រញាក់ជានិច្ចកាល គឺមកពីគិតអំពីថាតើនឹងមានអ្វីកើតឡើង? នឹងមានអ្វីខុសឆ្គង? ឧទាហរណ៍ៈ អ្នកមើល/ ស្តាប់នឹងសួរនូវសំណួរដែលខ្លួនឆ្លើយមិនបាន ឬអ្នកមើល/ ស្តាប់នឹងធុញទ្រាន់ ឬក៏ស្តាប់មិនយល់ជាដើម។ ចូរអ្នកព្យាយាមសំឡឹងមើលទៅប្រិយមិត្តរបស់អុ្នក ដោយការចាប់អារម្មណ៍ និងញញឹមប្រកបដោយភាពទន់ភ្លន់ម៉ឺងម៉ាត់ទៅកាន់ពួកគេ ហើយគិតតែម្យ៉ាងថាតើខណៈនេះអ្នកគួរធ្វើយ៉ាងណាដើម្បីឲ្យប្រិយមិត្តអ្នកយល់នូវអ្វីដែលអ្នកកំពុងនិយាយ ឬបង្ហាញនោះគឺជាការស្រេច។

៣. កែកំហុសជាការអភិវឌ្ឍជំនាញ និងបទពិសោធន៍៖ នៅលើលោកនេះគ្មាននរណាម្នាក់ ដែលមិនធ្លាប់បរាជ័យក្នុងរឿងអ្វីមួយនោះទេ គ្រាន់តែថាបរាជ័យនោះមានទម្ងន់ប៉ុណ្ណា។ ក៏ដូចគ្នាដែរ ការនិយាយ ឬការធ្វើបទបង្ហាញផ្សេងៗរមែងមានកំហុស ឬភាពខ្វះខាតចន្លោះប្រហោងខ្លះៗចៀសមិនផុត ប៉ុន្តែប្រការសំខាន់គឺគប្បីរៀនកែប្រែពីចំណុចអវិជ្ជមាននោះធ្វើជាបទពិសោធន៍ ដោយអភិវឌ្ឍវាឲ្យទៅជាសមត្ថភាពជំនាញ កុំឲ្យវាខុសដដែលៗ។

៤. ចំណាយពេលរៀនបង្កើតទំនុកចិត្ត៖ ការមានទំនុកចិត្តខ្លួនឯង គឺមានតម្លៃមិនអាចកាត់ថ្លៃបាន។ កិច្ចការទាំងពួងជោគជ័យដោយសារមានជំនឿចិត្ត បើគ្មានជំនឿចិត្ត អ្នកនឹងបរាជ័យ។ នៅពេលអ្នកនិយាយ ឬធ្វើបទបង្ហាញ អ្នកត្រូវតែជឿជាក់លើសមត្ថភាពខ្លួនឯងថាអ្នកអាចធ្វើបាន ហើយចូរតាំងចិត្តធ្វើដោយអង់អាចស្វាហាប់។

៥. អនុវត្តនៅនឹងកន្លែង៖ មិនថាអ្នកនៅទីណាទេ អ្នកអាចរៀនអនុវត្តបន្ស៊ាំធ្វើវាឲ្យបានញឹកញាប់ដើម្បីឲ្យវាក្លាយទៅជារឿងសាមញ្ញ។ ការហ្វឹកហាត់សមដដែលៗនៅផ្ទះរបស់អ្នក ឬជាមួយមិត្តភក្តិ ដោយនិយាយដាក់កញ្ចក់ ឬជញ្ជាំងជាដើម មិនត្រឹមតែធ្វើឲ្យអ្នកក្លាហានទេ តែថែមទាំងធ្វើឲ្យចាំស្ទាត់ជំនាញ និងរហ័សរហួនទៀតផង៕ (ប្រភពពី៖ RachelGreen.com)
ប្រែសម្រួលដោយ៖ មត សុមឿន

Search This Blog

Mut Somoeun (Mongkol)