តើខ្មែរមានប្រភពដើមកំណើតមកពីណា?

ជាយូរយាណាស់មកហើយ អ្នកសិក្សាស្រាវជ្រាវខ្មែរបានខិតខំស្រាយចម្ងល់អំពីបញ្ហាកំណើតខ្មែរ។ អ្នកស្រាវជ្រាវបានបញ្ចេញយោបល់ប្លែកៗគ្នា ដែលជួនកាលផ្ទុយស្រឡះពីគ្នាតែម្តង។ ដូច្នេះ តើខ្មែរមានដើមកំណើតមកពីណានិងមានវត្តមាននៅក្នុងទឹកដីនេះតាំងពីពេលណា? យោងតាមទស្សនាវដ្តីអក្សរសាស្ត្រ-មនុស្សសាស្ត្រ លេខត្រីមាសទី៤ ឆ្នាំ២០០១ ចេញផ្សាយដោយសាកលវិទ្យាល័យភូមិន្ទភ្នំពេញបានបង្ហាញទស្សនៈពីរប្លែកគ្នា ទាក់ទងនឹងបញ្ហាប្រភពកំណើតខ្មែរគឺ៖

ទស្សនៈទី១៖ ទទួលថាជាតិខ្មែរជាជាតិប្រវេសន៍ចេញពីប្រទេសឥណ្ឌា ហើយបានលុកលុយដណ្តើមយកទឹកដីរបស់ជនជាតិដើមមួយ គឺជនជាតិក្នុងអំបូរម៉ាឡាយូប៉ូលីណេស៊ីយ៉ែន។ ទស្សនៈនេះត្រូវបានបង្កើតមុនគេដោយលោក Henricke Kerne។ បន្ទាប់មកក៏មានអ្នកស្រាវជ្រាវខ្លះទៀតយល់ដូចលោក Adhenard Lecĺere និងលោក Pierre Gourou ដែរ។ លោក Pierre Gourou បានបញ្ជាក់ថា ជនជាតិខ្មែរប្រហែលជាត្រូវពួកត្រាវិឌ ឬពួកអារ្យ (អរិយៈ) ចេញពីឥណ្ឌា ហើយដោយមានសេសសល់ក្រុមខ្លះ ដូចជាពួកមុណ្ឌ បានមកលុកលុយប្រទេសភូមា ប្រទេសសៀម និងប្រទេសខ្មែរ។ ចំណែកលោក Etiene Aymonier យល់ថាក្រុម មន-ខ្មែរជាក្រុមមុណ្ឌមានតាំងពីដើមនៅជើងភ្នំទីបេ ហើយក្រោយមកបានបំបែកជាពីរក្រុមគឺ មន-ខ្មែរ ចូលមកតាំងនៅភូមិភាគអាស៊ីអគ្នេយ៍ ឯមួយក្រុមមួយទៀតគឺមណ្ឌុ បានចូលទៅនៅក្នុងប្រទេសឥណ្ឌារហូតដល់សព្វថ្ងៃ។

ទស្សនៈទី២៖ ទទួលស្គាល់ថា ជនជាតិខ្មែរជាជនជាតិមួយស្ថិតនៅក្នុងក្រុម មន-ខ្មែរ ហើយបានកើតឡើងនៅភូមិភាគអាស៊ីអគ្នេយ៍នេះតាំងពីបុរាណមក។ បើតាមយោបល់របស់លោក Bernard Philiffe Groslier ដែលបច្ចុប្បន្ន គឺជាអ្នកអភិរក្សអង្គរ និងលោក Macel Talahot យល់ឃើញថាក្នុងសម័យ ឌុណូ ប្រវត្តិសាស្ត្រដ៏យូរលង់មកហើយ មានមនុស្សជាច្រើនក្រុមបានធ្វើដំណើរពីខាងជើងចុះមកភាគអាស៊ីអគ្នេយ៍ដូចជាពួកអូស្ត្រាឡូអ៊ីត មេឡាអេស៊ីយាង និងឥណ្ឌូណេស៊ីយាងជាដើម។ អំបូរ មន-ខ្មែរ បានកើតឡើងដោយការកាត់ផ្សំរវាងពួកឥណ្ឌូណេស៊ីយាង និងបេឡានេស៊ីយាង ហើយបានរស់នៅរាយប៉ាយលើទឹកដី ដែលលាតសន្ធឹងពីឥណ្ឌូចិន ជ្រោយម៉ាឡាយូរហូតដល់ព្រំប្រទល់ប្រទេសឥណ្ឌា។

គួរកត់សម្គាល់ថាយោបល់នៃក្រុមទាំងពីរខាងលើនេះ មានលក្ខណៈស្របទៅនឹងទស្សនៈរបស់ខ្មែរ ព្រោះបើយើងសំអាងទៅលើរឿងព្រេងខ្មែរ ដោយសារតែមាននាងនាគនៅស្រុកខ្មែរ ទើបព្រះថោងដែលគេថាមកពីស្រុកឥណ្ឌាបានជួបប្រភពគ្នា ហើយបានគ្រប់គ្រងនគរគោកធ្លកនេះឯង។ បានសេចក្តីថា លុះត្រាតែមានជនជាតិខ្មែរនៅលើកោះគោកធ្លកនេះមុនរួចហើយ ទើបឥណ្ឌាអាចផ្សាយអរិយធម៌របស់ខ្លួនបានខ្លះចូលក្នុងស្រុកខ្មែរ។ សេចក្តីក្នុងរឿងព្រេងនេះ សឲ្យឃើញថា ចំពោះជាតិខ្មែរយើង មានប្រភពនៅក្នុងស្រុកខ្មែរមុនឥណ្ឌាមកម្ល៉េះ។
ថ្មីៗនេះលោកបណ្ឌិត ម-ត្រាណេ ជាអ្នកស្រាវជ្រាវវប្បធម៌ខ្មែរ លោកបានយល់ស្របជាមួយមតិទី២ គឺលោកបានបញ្ជាក់ថាខ្មែរមានជីវិតនៅលើទឹកដីខ្មែរតាំងពី ៦៨០.០០០ឆ្នាំមុនគ.ស រហូតដល់សតវត្សទី១នៃគ.ស ដែលជាសម័យថ្មគ្រួសបំបែក មានអាយុ ៦៨០.០០០ឆ្នាំ ដល់១២០០.០០០ឆ្នាំមុនគ.ស។ លោកបញ្ជាក់ថាយុគនេះអាចជាការចាប់ផ្តើមនៃអរិយធម៌ខ្មែរ ហើយការចងក្រងទំព័រប្រវត្តិសាស្ត្រកម្ពុជា ត្រូវស្ថិតនៅលើសម្ភារៈវប្បធម៌កម្ពុជាដំបូងបង្អស់ជាមូលដ្ឋាន។ វប្បធម៌ អរិយធម៌ខ្មែរ ដូចបានបញ្ជាក់ជូនខាងលើក៏អាចបង្ហាញឲ្យអ្នកសិក្សាស្រាវជ្រាវវិភាគពីប្រភពព្រះពុទ្ធសាសនានៅប្រទេសកម្ពុជាផងដែរ៕
អត្ថបទដោយ៖ ឈួន ល័ក្ខ
កែសម្រួលដោយ៖ មត សុមឿន

Search This Blog

Mut Somoeun (Mongkol)