៧ចំណុចបង្កើនការអានរបស់លោកអ្នកឲ្យលឿន ហើយយល់បានល្អ

អំណានគឺជាកូនសោដ៏មានអំណាច សម្រាប់ចាក់បើកទ្វារចូលទៅរកពិភពនៃចំណេះដ៏ពិតប្រាកដបាន។ មិនថាអ្នករៀនដល់កម្រិតណា ឬបានសញ្ញាមកពីណានោះទេ បើខ្វះការអាននោះសញ្ញាបត្ររបស់អ្នកនឹងក្លាយជាក្រដាសឥតការ។ នៅក្នុងអត្ថបទមួយចេញផ្សាយដោយមជ្ឈមណ្ឌលដើម្បីភាពជោគជ័យក្នុងការសិក្សា (Center for Academic Success) នៃសកលវិទ្យាល័យ The University of Alabama បានបង្ហាញថា ៨៥% នៃនិស្សិតមហាវិទ្យាល័យ ទាមទារឲ្យអានជាដាច់ខាត។ ក្នុងនោះដែរ អត្ថបទនេះក៏បានផ្តល់ជាគន្លឹះ៧ចំណុច ដើម្បីបង្កើនការអានឲ្យបានលឿន និងយល់បានល្អដូចខាងក្រោម៖

១. ពិចារណាលើទម្លាប់អានរបស់អ្នក៖ ការពិនិត្យវាយតម្លៃលើទម្លាប់នៃការអានរបស់អ្នក គឺជារឿងដ៏សំខាន់ ដែលអ្នកគួរតែធ្វើ ដើម្បីឲ្យដឹងថាតើអ្នកមានទម្លាប់ណាមិនល្អត្រូវកែប្រែ។ ឧទាៈ អ្នកចូលចិត្តពិនិត្យពិច័យពាក្យប្លែកថ្មី អានម្តងហើយម្តងទៀត ឬអានឲ្យតែលឿនដើម្បីបញ្ចប់អត្ថបទជាដើម។

២. រកកន្លែងអានត្រឹមត្រូវ៖ ការផ្តល់លក្ខខ័ណ្ឌល្អក្នុងការអាន ក៏ជារឿងដ៏ចាំបាច់។ អ្នកគួររកកន្លែងអានឲ្យបានល្អ មិនមានការរំខានដោយសម្លេង ពន្លឺ ឬកម្តៅជាដើម ពោលគឺត្រូវអង្គុយអានលើកៅអីល្អសមរម្យ បន្ទប់មានផាសុកភាព ហើយកាន់សៀវភៅអានឲ្យឆ្ងាយពីចិញ្ចើម១៥អ៊ីង។

៣. ប្រើភ្នែកឲ្យបានត្រឹមត្រូវ៖ អ្នកត្រូវច្បាស់ថា បើអ្នកអានអក្សរទៅមានលក្ខណៈព្រឹល អ្នកត្រូវប្រញាប់ប្រញាល់ទៅឲ្យគ្រូពេទ្យឯកទេសភ្នែកពិនិត្យមើលដើម្បីព្យាបាល ឬត្រូវប្រើវ៉ែនតាជំនួយ។ កុំព្យាយាមអានសារឡើងវិញនូវពាក្យទាំងឡាយណា ដែលមិនចាំបាច់ ហើយមិនត្រូវអានគ្រប់ពាក្យនោះទេ ប៉ុន្តែត្រូវអានឃ្លាឲ្យបានយល់ច្បាស់។

៤. បង្កើនចំណេះគ្រាប់ពាក្យ៖ រាល់ពេលអាន អ្នកគួរយកវចនានុក្រមមកដាក់ក្បែរខ្លួន ដើម្បីពិនិត្យអត្ថន័យពាក្យណាដែលមិនចេះ និងស្វែងយល់ពីប្រភពពាក្យនោះ។

៥. បង្កើនល្បឿនអានឲ្យទាន់អត្ថបទ៖ អ្នកត្រូវដឹងពីអ្វី និងមូលហេតុដែលអ្នកកំពុងអាននោះ ពោលគឺត្រូវចំណាយពេលអានអ្វីមួយដោយយល់ខ្លឹមសារ។ បើអ្នកអានដើម្បីរំលឹកមេរៀន អ្នកគ្រាន់តែអានត្រួសៗ បើអានមេរៀនដែលត្រូវរៀន ត្រូវអានឲ្យច្បាស់ និងយឺតៗឲ្យយល់ តែបើអានដើម្បីកំសាន្ត អ្នកគួរអានឲ្យលឿន។

៦. បង្កើនល្បឿនអាន៖ ដើម្បីឲ្យការអានរបស់អ្នកបានលឿន និងយល់ខ្លឹមសារ អ្នកត្រូវអនុវត្តអានយ៉ាងហោចណាស់ឲ្យបានពី១៥ ទៅ៣០នាទី ក្នុង១ថ្ងៃ ដោយត្រូវពិនិត្យមើលខ្លួនឯងថាតើអ្នកអានបានប៉ុន្មានពាក្យក្នុង១នាទី។ បន្ទាប់មក អ្នកត្រូវពិនិត្យមើលថាតើអ្នកយល់ខ្លឹមសារក្នុងអត្ថបទដែលអាននោះរឺអត់។ អ្នកត្រូវធ្វើដូច្នេះដដែលៗជារៀងរាល់ថ្ងៃ ដើម្បីបង្កើនល្បឿនអាន និងការយល់ខ្លឹមសារឲ្យមានប្រសិទ្ធភាព។

៧. ស្វែងរកជំនួយប្រឹក្សាពីគន្លឹះអាន៖ បើអ្នកបានអនុវត្តតាមវិធីខាងលើហើយ នៅឡើយមិនសូវទទួលបានផលល្អ អ្នកគួរស្វែងរកគន្លឹះណែនាំពីវិធីអានពីប្រភពផ្សេងៗ ឬគួរប្រឹក្សាសុំយោបល់ពីអ្នកណាដែលពូកែក្នុងផ្នែកនេះ៕ (ប្រភព៖ www.ctl.ua.edu)
អត្ថបទដោយ៖ មត សុមឿន

Search This Blog

Mut Somoeun (Mongkol)